Deputetja e PDK-së, Blerta Deliu-Kodra, ka thënë që ky subjekt politik kërkon përgjegjësi dhe drejtësi për rastin e 26 vjeçarit i cili humbi jetën tragjikisht në Qendrën Studentore në Prishtinë.

Deliu – Kodra ka theksuar se përkundër përpjekjeve të familjes për ta shpëtuar, i ndjeri Agon Musliu gjeti vdekjen në duart e shtetit.

“Dua t’i shpreh ngushëllimet familjes Musliu. Ishte lajm i rëndë që tronditi tërë opinionin publik. Kjo Qeveri në detyrë ka pasë qasje selektive, është sjellë në mënyrë të ndryshme me qytetarët e Kosovës të riatdhesuar”.

“Një pjesë i ka zbatuar në përpikmëri masat e karantinimit dhe një pjesë tjetër nuk i ka respektuar ato”.

Deputetja e PDK-së në Klan Kosova e ka quajtur skandaloze deklaratën e ministrit në detyrë të Shëndetësisë, Arben Vitisë i cili ka thënë që MSH-ja nuk ka pasë dokument që i ndjeri ka pasë probleme shëndetësore.

“Ishte skandaloze deklarata e ministrit Vitia. Ne si PDK e kemi pasë dokumentin publik, që tregon qartë që 26 vjeçari nga Gjilani ka pasë probleme shëndetësore”.